Judg 14 | NdeIBE | STEP | USamsoni waya eThimina wabona intombi yesiFilisti.

Judges 14

Ukuthatha kukaSamsoni

1 USamsoni waya eThimina wabona intombi yesiFilisti. 2 Esebuyele, wathi kuyise lonina, “Ngibone intombi yesiFilisti eThimina; ake liyengithathela yona ukuba ibe ngumkami.”

3 Uyise lonina baphendula bathi, “Kanti akulantombi eyamukelekayo yini phakathi kwezihlobo zakho loba phakathi kwabantu bonke bakithi? Usungaze uye kumaFilisti angasokanga ukuba uthathe umfazi na?” Kodwa uSamsoni wathi kuyise, “Ngithathela yena. Nguye ongifaneleyo.” ( 4 Uyise lonina babengazi ukuthi lokhu kwakuvela kuJehova, owayefuna ithuba lokumelana lamaFilisti; ngoba ngalesosikhathi ayebusa elako-Israyeli.)

5 USamsoni waya eThimina eloyise lonina. Bathe sebebanga ezivinini zeThimina kwathutsha ibhuklwana lesilwane libhonga lisiya kuye.

6 Umoya kaNkulunkulu wafika kuye ngamandla wasidabula ngezandla zakhe njengayengakwenza edabula izinyane lembuzi. Kodwa uyise lonina kabatshelanga ayekwenzile.

7 Emva kwalokho wahamba wayakhuluma lowesifazana lowo, wezwa emthanda.

8 Emva kwesikhathi esithize, esebuyele ukuba ayemthatha, waphambuka ukuba abone isidumbu sesilwane. Phakathi kwaso kwakulomtshitshi wezinyosi ziloluju,

9 waluthapha waluphatha ngezandla zakhe wahamba eludla. Kodwa kabatshelanga ukuthi uluju wayeluthethe esidunjini sesilwane.

10 Uyise wahamba ukuyabona owesifazana lowo. USamsoni wenza idili khona, njengokwakungumkhuba wezinsizwa ezithathayo. 11 Ekufikeni kwakhe waphiwa abakhaphi abangamatshumi amathathu.

12 USamsoni wasesithi kubo, “Lalelani ngilitshele ilibho. Lingangitshela ukuthi litshoni phakathi kwezinsuku eziyisikhombisa zedili, ngizalinika izambatho zelineni ezingamatshumi amathathu lezigqoko ezingamatshumi amathathu. 13 Uma lisehluleka ukungitshela ukuthi litshoni, kumele linginike izambatho zelineni ezingamatshumi amathathu lezigqoko ezingamatshumi amathathu.” Bona bathi, “Sitshele ilibho lakho. Litsho silizwe.”

14 Waphendula wathi, “Kokudlayo, kwaphuma okudliwayo; Kokulamandla kwaphuma okumnandi.” Behluleka ukuyitsho impendulo okwezinsuku ezintathu.

15 Ngosuku lwesine bathi kumkaSamsoni, “Ncenga umkakho asichazele ilibho, hlezi sikutshise wena labendlu yakwenu life. Kanti usinxusele ukuzasiphanga lapha na?”

16 Lapho-ke umkaSamsoni waziphosela phezu kwakhe, ebubula esithi, “Uyangizonda. Kawungithandi okweqiniso. Unike abantu bakithi ilibho; kodwa mina kawungitshelanga ukuthi litshoni” Yena waphendula wathi, “Angilichazanga lakubaba lomama, pho ngingalichazelani kuwe na?” 17 Owesifazana lowo wakhala zonke lezozinsuku eziyisikhombisa zedili. Ngakho ngosuku lwesikhombisa wamtshela, ngoba waqhubeka emcindezela. Laye-ke walichaza ilibho ebantwini bakibo.

18 Kwathi ilanga lingakatshoni ngosuku lwesikhombisa abantu bakulowomuzi bathi kuye, “Kuyini okumnandi kuloluju na? Kuyini okulamandla kulesilwane na?” USamsoni wathi kubo, “Aluba kalilimanga ngethokazi lami kade lingeke liliqambe ilibho lami.”

19 UMoya kaJehova wasusehlela phezu kwakhe ngamandla. Waya e-Ashikheloni, wabulala abantu bakhona abangamatshumi amathathu, wabakhulula impahla yabo kwathi izigqoko zabo wazinika labo ababechaze ilibho lakhe. Waya endlini kayise evutha ulaka.

20 UmkaSamsoni wasesendiselwa kumngane lowo owayengumkhaphi wakhe omkhulu.